Редакцийн бодлого

Юуг зарж болох, юуг зарж болохгүй вэ

Urban UB уншигчдад үнэгүй, сурталчилгаагаар санхүүждэг. Ийм загварт хамгийн чухал зүйл бол редакц ба сурталчилгааны хоорондох зааг хаана байгааг ил хэлэх явдал. Доорх бодлого нь бидний өөрсдөдөө тавьсан хязгаар.

1. Бид юу хэвлэдэг вэ

Улаанбаатарт амьдрах тухай материал. Хоол, хөгжим, орон зай, спорт, хувцас, эрүүл мэнд, хотын түүх. Материал бүр уншигчид ямар нэг зүйл өгөх ёстой — мэдээлэл, өнцөг, эсвэл зүгээр л сайхан уншлага. Энэ шалгуурыг давахгүй материал хэдий мөнгө төлсөн ч гарахгүй.

2. Сурталчилгаа ба редакцийн зааг

Сурталчилгааны нүүр сэтгүүлийн 50 хувиас хэтрэхгүй. Энэ бол тоон хязгаар бөгөөд дугаар бүрт мөрддөг.

Редакцийн нүүр худалдаанд байдаггүй. Нүүр өгүүлэл, эссэ, ярилцлага, фото материалыг мөнгөөр авах боломжгүй. «Танай тухай нийтлэл бичиж өгье» гэсэн санал бидэнд байхгүй.

Хамтрагчийн материалыг үргэлж тэмдэглэдэг. Байгууллагын оролцоотой, мөнгө төлөгдсөн материал бүр «Хамтарсан нийтлэл» гэсэн тэмдэгтэй гарна — хэвлэмэл дээр ч, вэб дээр ч. Уншигч юу уншиж байгаагаа мэдэж байх ёстой.

Сурталчилагч редакцийн агуулгад нөлөөлөхгүй. Зар өгсөн байгууллага тухайн дугаарын бусад материалыг хянах, өөрчлөх, зогсоох эрхгүй. Мөн бидний бичсэн шүүмжийг өөрчлөх үндэслэл болохгүй.

3. ASK ABOUT булан — мэргэжлийн контент

Энэ буланд эмч, мэргэжилтний хариулт гардаг бөгөөд тухайн байгууллага хамтрагчаар оролцдог. Тиймээс гурван дүрэм үйлчилнэ:

Хариултыг өгсөн хүний бүтэн нэр, мэргэжил, байгууллагыг үргэлж нэрлэнэ. Нэргүй «мэргэжилтэн» гэж гарахгүй.

Материал нь эмчийн үзлэгийг орлохгүй. Эрүүл мэндийн шийдвэрээ мэргэжлийн хүнтэй зөвлөлдөж гаргана уу.

Тодорхой эм, бүтээгдэхүүнийг нэрлэж сурталчлахгүй. Оношлогоо, эмчилгээний үр дүнг амлахгүй.

4. Эх сурвалж ба баримт

Тоо, огноо, нэрийг нийтлэхээс өмнө шалгана. Шалгаж чадаагүй бол нийтлэхгүй, эсвэл шалгаагүй гэдгийг нь хэлнэ.

Шүүмжлэгдсэн тал байвал байр сууриа илэрхийлэх боломж олгоно. Татгалзсан бол татгалзсаныг нь бичнэ.

Эх сурвалжийг нууцлах хүсэлтийг хүндэтгэнэ. Нэрээ нууцалсан эх сурвалжийн мэдээллийг бусад эх сурвалжаар давхар шалгахыг эрмэлзэнэ.

5. Зураг, зохиогчийн эрх

Зураг бүрийн зохиогч эсвэл эх сурвалжийг нэрлэнэ. Архивын зураг ашиглахдаа эзэмшигчээс зөвшөөрөл авна.

Хиймэл оюунаар үүсгэсэн зураг ашигласан бол тэр тухай тэмдэглэнэ. Бодит үйл явдлыг дүрсэлсэн мэт хиймэл зураг хэрэглэхгүй.

Зургийг агуулгыг нь өөрчлөх байдлаар засварлахгүй. Өнгө, тодрол, хэмжээний энгийн засвар үүнд хамаарахгүй.

6. Алдаа засах

Алдаа гаргадаг. Чухал нь түүнийг хэрхэн заддаг вэ гэдэг.

Батлагдсан алдааг вэб дээр нэн даруй засаж, нийтлэлийн доор юу засагдсаныг тэмдэглэнэ. Нийтлэлийг чимээгүй өөрчлөхгүй.

Хэвлэмэл дээр гарсан алдааг дараагийн дугаарт залруулна.

Алдаа олсон бол hi@urbanub.city руу бичээрэй.

7. Ашиг сонирхлын зөрчил

Редакцийн гишүүн тухайн материалын сэдэвтэй санхүүгийн холбоотой бол түүнийг бичихгүй, эсвэл холбоог нь ил тэмдэглэнэ.

Сэтгүүлийн эзэмшигч, ажилтны өөрийн бизнесийн тухай материал гарвал харилцан хамаарлыг нь заавал бичнэ.

8. Асуух зүйл байвал

Энэ бодлогын талаар эсвэл аль нэг нийтлэлийн талаар асуулт байвалбидэнтэй холбогдоорой. Бодлого өөрчлөгдвөл энэ хуудсан дээр шинэчилнэ.

Сүүлд шинэчилсэн: 2026 оны 10 сар